President Donald Trump-a’n 2019-a hnathawhna tur sum a ruahman danah congress nen an inrem theih loh avangin US sorkar hnuaia Dept \henkhat sum hman tur chu pass theih a ni lo a, Dept \henkhat chu December 22 atang khan khar a ni tawh a, executive department 9 hnuaia thawktu mi 800,000 te chuan hlawh an la thei lo a, hei hi sorkar hnathawk hmun li-a \hen-a hmun khat zet an tling a ni. Trump-a hian US leh Mexico inkara ramri hungnna tur dollar tluklehdingawn 5.7 tel lo chuan budget hi pass a remti lo a. Ramri hung hi Democratic party lam chuan an duh lo thung a ni.
A hnuai thawk official te sawidan chuan Trump-a hian Democrat te nena an inbiakrem theih dan tur ruahmanna siam a tum a, ramri hung erawh kaltlangpui ngei a tum thung. Democrat te chuan hnathawk thei lova khar mek dept te sum hman tur pass phawt a nih loh chuan President nena inbiak an duh bik loh avangin, inremna neih theih mai a beiseiawm loh a ni. President hian Emergency puanga Congress thuneihna kalkanin, sum ruahman hi a kaltlangpui thei a, emergency puan mai tur a ni em tih erawh Trump-a leh a \huihhruaite hian an la ngaihtuah mek a ni.
Kar engemawzat chhung indawr tawh mahse, Trump leh Democrat te hi an inrem thei lova, Democrat House Speaker Nancy Pelosi chuan Trump-a’n a Mexico ramri hung a tumnah sum mamawh pass sak an tum loh thu a sawi. Hnathawktu tam tak, hun rei tak hlawh la tawh lo te chuan harsatna an tawk zual zel a, ni tin ei tur leina pawh nei tawh lo, a thlawnna eitur semchhuahna hmun pante pawh an awm a, an thil hlu neih ang ang hralh \hen an awm bawk. Officer \henkhat khar hun chhung hi ni 29 a tling ta a, hnathawktute an hlauthawng tawh hle a ni.
