Cabinet Minister pakhat sawi danin heng mite hian ram dang a\anga mifirfiak pawlte puihna an dawng em tih chhui chian mek a ni tih a sawi a, Sri Lanka police hotu lu ber chua April ni 11 khan fimkhur tura hriattirna ti chhuakin NTJ hian biak in leh Indian High Commission te beih tumin ruahmanna an siam tih ram dang inteligence ten an hrilh lawk thu a lo sawi tawh a ni. Police te chuan pawikhawihna-a inhnamhnawiha puh mi 24 an man tawh tih an sawi a, thu chiang erawh an la puangzar lo thung.
Sri Lanka sorkar hian zanin a\ang hian ram pum huap emergency a puang dawn a, emergency hnuaiah hian mifirfiakte beih let theihna turin thuneihna sang zawk sipai ten an nei dawn a, zan lamah dar 8 a\anga a tuk zing dar 4 thlengin curfew puan chhunzawm a la ni dawn a ni.
Bomb hmanga Sri lanka khawpui Colombo-a biak pathum leh hotel changkang pathum beihnaah hian thi zat finfiah tawh chu 290 an ni tawh a, heng zingah hian mi 10 chuang ramdangmi an awm a ni. Easter sunday puala inkhawm an tam laiin Biak In te hi beih a ni a, Colombo archbishop Malcolm Ranjith chuan he pawikhawihna hi na taka demin pawikhawihtute chet dan chu mihring chet zia a ni lo a ni a ti a, pawikhawihtute man chhuaka na taka hrem turin thuneitute a ngen tih a sawi. Colombo-a ramdang palai te chenna embassy te chuan boruak san vanglai a nih avangin ramdang mite chu in chhunga tawm rih turin thurawn an pe a ni.
