Sri Lanka buaina chuan ziaawm lam a la pan thei lo a, hmun hrang hrangah Buddhist sakhaw zuitu rualten tharum an thawh nasa hle a, Muslim sakhaw betute kut an thlak bakah an chenna in te pawh an suasam nasa hle. Buaina chhuak vang hian Sri Lanka sorkar chuan social media hrang hrang hman theih loh turin a siam a, curfew a la puan chhunzawm zel bawk a ni. Sri Lanka ram laili-a awm, Mullegama-ah Muslim-te chu an biak-inah an tlanchhe hlawm a, an chenna in te hal a nih vangin, venhimna an mamawh hle tih an sawi a, anmahni beitute zing ami pakhat bomb puak vanga thi a awm tih an sawi bawk a ni. Police-te chuan bomb puak hi engnge a nih an la hriat loh thu leh, tu tih nge an la chhui mek tih an sawi a, Buddhist-te hian Muslim biak-in te pawh lungin an bei tih an sawi bawk a ni. Katugastota-a Muslim puithiam chuan an mi-te dawr thahnem tak hal a ni tih a sawi bawk a, Buddhist zingah hian mi fel tak tak an awm thu leh pawikhawihtute hi chu a kal filawr zual, anmahni thiktute nia an hriat thu te a sawi bawk a ni. Sri Lanka-a Muslim zingah hian sumdawng eng emaw zat an awm a, hei vang hian beih an tawk hma bik niin mi thenkhat chuan an sawi a ni.
Chanchin Thar Sri Lanka buaina-in ziaawm lam la pan thei lo, tharum thawhna la...
