Thuneitute sawidanin Facebook-ah kum 38 mi Abdul Hameed Mohamed Hasmar-a’n “Ni khat chu lungaiin in la \ap ang” tia comment a ziah chu mipuiten vaunaah ngaiin Chilaw khua-a mosque leh Muslim ten an enkawl dawrte an suasam a, Muslim mi pakhat an sawisa bawk a ni. Kurunegala disrict-ah Muslim dawrte suasamtu mi engemaw zat police te’n an man, Facebook-a post siamtu Hasmar hi an man bawk a ni. Sipai thupuangtu Sumith Atapattu chuan Kurunegala-a mipuite hian an mi mante hi chhuah an phut a, buaina a thlen belh lohna turin zanlaiah curfew puan a ni tih a sawi.
Sri Lanka Islamist pawlte’n thihchilh bomb hmanga hotel 4 leh Christian biak in 3 te bei-a mi 258 nunna an lak hnuah Muslim pawlte chuan Muslim te laka hleilenna a thleng nasa hle tih an sawi a, mipuite lam hian sorkar chu pawikhawihna dang zo lo-ah ngaiin mifirfiakte hi man kim an ni lo ang tih hlauhthawnna an la nei lian hle.
Information Department-a Direstor General Nalaka Kaluwewa chuan thudik lo puandarh a, inhmuhthiam lohna a thlen loh nan Facebook, WhatsApp, Viber, IMO, Snapchat, Instagram leh Youtube te chu hman theih loh tura tih tawp lailawk a ni tih a puang a ni.
