Lengpui khelmuala phullem artificial turf phahna tur hian Sports & Youth Affairs Ministry hnuaia Khelo India Scheme atangin cheng vaibelchhe 5 ruahman a ni a, khelmual hi a dung meter 110 leh a vang meter 74 a zau a ni dawn a, phul lem phah hi Guwahati-a Decor India – Complete Sports Solution in an thawk dawn a ni.
Hemi puala inkhawm tawi buatsaihah Sports Minister chuan, Chief Minister Pu Zoramthanga kaihhruai sorkarin infiamna awmze nei leh hmasawn a awm theih nan tunhmaa la neih ngai loh Mizoram Sports Policy 2019 a duang tih a sawi a, hetah hian infiammite hlawhtling te tana abika sorkar hna zaa 5 hauhsakna pawh tihfel a ni tawh tih sawiin Sports chu eizawnan tlak a siam turin sports chu industry-a puan a ni tawh bawk tih a sawi a, FICCI pawhin investment plan an buaipui tan tih a sawi.
Inkhawm hi Sports Secretary Pu H. Lalengmawia’n a kaihruai a, bialtu MLA Pu Lalzirliana, Sports, Youth Affairs and Tourism Development Board Vice Chairman Pu TC Pachhunga leh mipawimawh dang te an tel a ni.
