Election Commission thupek anga Mizoram pum huapa Electoral Roll ennawnna, Special Summary Revision of Photo Electoral Roll tun thla atanga neih tur chungchang chu vawiin khan District Level Standing Commitee-in DC Conference Hall-ah Mamit Bawrhsap, Pi Lalbiaksangi hovin an sawiho a, Political party hrang hrang aiawh, tlawmngai pawl hrang hrang aiawh leh zirna ina thawkte an tel a ni. Bawrhsap chuan Photo Electoral Roll ennawnnaah hian nakkum, January ni 1-a kum 18 tling chin, ram khua leh tui dik takte electoral roll-a thun theih an ni dawn tih a sawi a, a bul tan nan electoral roll neih lai, Draft Roll chang tur chu tun thla ni 15-ah tar chhuah a ni ang a, hemi ni atanga October ni 13 thleng electoral roll-a inthun dil duhte leh siam that leh tihdik dil duhte tan hun hawn a ni ang a, hemi chhunga dilna leh sawiselna dawnte chu kumin November ni 10 thleng chin fel a ni ang a, electoral roll thar hman theih tur chu nakkum January ni 15-ah peih fel a ni dawn tih a sawi. Electoral roll ennawnna buaipuitu turte chu dik tak leh fel taka an hna theuh hlen chhuah tum turin a chah a ni.
