Nupa hi kum 57 mi David Turpin leh a nupui kum 50 mi Louise Turpin te an ni a, an fanu kum 17 mi chu an in tukverh a\anga lawn chhuakin police te a koh hnuah an in hi dap a ni a, an fate dang 12, kum 2 a\anga kum 29 mite chu an inhnuai lama hmun hnawm leh rimchhe takah hian an hreng tih hmuhchhuah a ni a, a \hen phei chu an khuma thlun beh te an ni a, ei \ha hmuh loh avangin an chauh hle bakah a \hen chu an \hang thei tawh lo a, Turpin te nupa hi man-in naupangte hi venhima enkawlna hnuaiah dah an ni.
An chungthu relnaah ukilte chuan naupang te hi ei \ha hmu loa, an hriselna pawh ngaihsak loin invawn thianghlim khapsak an nih mai bakah thil ho te te-ah na taka hrem an nih \hin thu an sawi a, naupangte pawh hian an nu leh pate’n an sawisak \hin dan an sawi bawk a, an fate thil sawi an ngaihthlak chuan Turpin te nupa hi an \ap a, Louise chuan a fate a hmangaih thu leh an hlimna a ngaih pawimawh ber thu a sawi a, a fate tina zawnga a thiltih zawng zawng avangin ngaihdam a dil a ni. Turpin te nupa hi kum 25 hnuah intiamkamna nena chhuah lailawk remtihna pek an nih loh chuan dam chhung lung in tang tura an chungthu rel a ni.
