Vawiin Assembly rorel inkhawm, zawhna leh chhanna hunah ZPM member, Aizawl North II bialtu MLA, Dr. Vanlalthlana’n zirtirtu lak turah induhsakna a awm loh nan leh dik taka tih a nih theih nan Hnam run List, Block leh Unit List a awm lo ang tih a tiam thei em tih Minister hi a zawt a, School Education Minister hian a zawhna hi chiang takin a chang lo a, zirtirtu lak chu dik tak kalpui a ni dawn tih erawh a sawi a. Zirtirtu lak turah hian a khaw mite duh sak an ni dawn a, an awm lo a nih pawhin a khaw hnaia mi te duhsak an nih tur thu a lo sawi tawh chu pawm turin a ngen a ni. School Education Minister hian tun hmaa Aizawl lama Transfer dil vanga sorkar-in harsatna nasa tak a tawh \hin chu a awm tawh loh nan zirtirtu hna dil turte chu an dilnaah an awm duhna District thlan tir nghal an ni dawn tih a sawi bawk.
Tun hnaia National Achievement Survey of India-in pawl 3, pawl 5 leh pawl 8 zirlaite a zirchiannaah pawl 5 leh 8 zirlaiten National Standard an phak lo hle nia sawi chu sorkar-in a hria tih Pu Lalchhandama Ralte hian a sawi a, hei hi CCE kalpui a nih avanga nia hriat a ni a, CCE chu a Policy a \ha lo tihna ni lovin zirtirtu indaih tawk lo leh he Policy hman thiam tawk lohna vangin kalphung thar hman tum a ni, a ti. CCE kalphung paih chuang si lovin tun hmaa kalphung lo hman tawh \hin kum khata \um 3 Exam ang khan zirna kalpui leh a ni dawn a, Calendar pawh siamfel a ni tawh tih a sawi.
Zirtirtu insawn dil vanga harsatna thleng \hin tih reh nan Transfer and Posting chungchang ennawntu tur Committee din a ni tawh a, tun thla chhung hian siamrem ngai awmte siamrem tura tih an ni tih Minister hian a sawi bawk.
Zawhna dang chhangin Pu Lalchhandama Ralte hian, sorkar enkawl sikul English medium-a leh tak tih lovah chuan Mizo \awng hman khap a nih thu hriat a ni lo tih House a hrilh a. Hmei chungchangah hian Sorkar laipuiin Education Policy thar a duan chu ngaihchan mek a ni a, zirlaiten Mizo \awng bakah English leh Hindi an thiam theih nan hmalak mek a ni, a ti. Kum 2017-a CSS hnuaia Hindi zirtirtu 1305 ban bakte chu a Policy a tawp tawh vang a ni tih Minister hian a sawi a, hei vang hian Mizorama zirna in zaa 40 vel chu Hindi zirtirtu nei lovin an awm mek tih a sawi a. Hindi zirtirtu hi lak leh an nih theih nan sorkar chuan hma la mek a, Human Resource Development Minister thar hnenah pawh DO Letter hmangin Hindi zirtirtu lak an nih theih nan hmalakpui turin a ngen tawh tih a sawi.
