Tun thla ni 1 a\anga hman tura ruahman lirthei intlanchhawkna dan thar hi Ukil intelkhawm, Mizoram Bar Association chuan mimal zalenna inrahbeh saknaah ngaiin hman a nih loh nan Gauhati High Court, Aizawl Bench-ah May ni 30 khan an khing a. Hemi chungchang ngaihtuahtu Judge, Justice Nelson Sailo Court chuan, May ni 31-a a ngaihtuah hnuah thu tlingah ngaiin, court in a ngaihtuah hma chu hmang \an rih lo tura sorkar hriattirin vawiin hi ngaihtuah hun tura a ruat a ni a, vawiinah hian Sorkar lamin he ruahmanna siam a nih dan leh a insawifiahna te court-ah hian a thehluh hman loh avangin thu leh awm hma chu lirthei intlanchhawkna dan thar chu hman a nih loh tur thu court hian a puang a ni.
Zonet thudawn danin, Sorkar Ukil-te chuan lirthei intlanchhawk dan thar ruahman a nih chhan Sorkar sawifiahna chu naktuk hian Court-ah an thehlut dawn nia hriat a ni a. Hei hi Court-in a ngaihtuah leh hun tur hriat ni rih lo mah se, thuremna erawh a awm thuai beisei a ni.
Kumin April ni 25-a Coordination Committee on Traffic Management \hukhawm chuan lirthei intlan chhawk dan thar hi an siam a, ruahman dan chuan Thawh\anniah lirthei number 1 leh 2 a tawp te an tlan thei dawn lova, thawhlehniah 3 leh 4-a tawp, nilainiah 5 leh 6, ninganiah 7 leh 8 leh Zirtawpniah 9 leh 0-a tawpte an tlan thei dawn lo a ni. Lirthei intlanchhawk rawtna hian Sorkar chawlh, Inrinni leh Pathianni te a huam lo thung.
