Indian Council of Medical Research Director General Dr. Balram Bhargava sawi danin National Accreditation Board Laboratories-in a pawm private labs 50 a\anga 60 New Delhi-ah a awm a, hengah te hian sorkar laipui phalna-in Covid-19 a test theih dawn a ni.
Tun dinhmunah sorkar lab-ah chuan Covid-19 hi a test theih a, heng lab-ah te hian ni khatah sample 5,000 a test theih a, amaherawhchu, sample 60 a\anga 70 chauh nitin enfiah a ni. Hei hi a chhan nia lang chu ram danga zin zinga Covid-19 vei nia rinhlelhte leh Covid-19 veite nen inkungkaihna nei te chauh enfiah an nih \hin vang a ni.
Vawiin khan Mumbai-a Kasturba damdawi inah Covid-19 vei kum 64 mi a thi a, ram chhunga hri leng thihpui tawh zat chu mi 3 an tling tawh a, vei zawng zawng zat chu mi 125 an tling tawh bawk.
Ram chhunga Covid-19 vei finfiah tawh zingah ram dang mi 22 an tel a, damdawi ina enkawl dam taka chhuak mi 13 an awm tawh bawk. Thawh\an zan khan Karnataka-ah mi 3 vei thar an awm a, heng mite nen hian Karnataka-a vei mi 10 an awm tawh a ni. Hri leng kai finfiah zinga pakhat chu kum 32 mi niin, software engineer a ni a, US a\angin London kaltlangin tun thla ni 8 khan a rawn haw a, pawn chhuak lovin in lamah a inkhung rih a ni.
Hetihlai hian Kerala khawpui Thiruvananthapuram-a sorkar damdawi ina thawk doctor 25 leh staff 47 velte chu in lama inkhung rih turin sorkarin a hriattir a, Sree Chitra Tirunal Institute for Medical Sciences and Technology-a doctor pakhat chu Spain a\anga a haw hnuah rinhlelh a kai vangin enfiah a ni a, hemi hnu hian Covid-19 a vei ngei tih finfiah a ni a, Kerala-ah hian mi 24 vei an awm tawh a ni.
Ram chhunga hri leng mek kai tamna ber state chu Maharashtra niin, mi 39-in an kai tawh a ni.
Cabinet Secretary chuan Indian Council of Medical Research, Union Health Ministry leh mi pawimawh dangte kohin Covid-19 \aidarh zel tur ven dan tur a sawipui a, WHO aiawha inkhawma tel Henk Bekedam chuan India-in hri leng zawn chhuah theihna \ha tak an nei tih sawiin, a bik takin ICMR leh health research dept. he lamah hian a chak tawk tih sawiin, natna hri chu an umbo thei a, India chu hri leng zawng chhuaktu pawl zingah a tel thei tih a sawi bawk.
Prime Minister, Narendra Modi chuan BJP Parliamentary inkhawmah Parliament chu April ni 3 thleng hawn a ni dawn tih a sawi a, MP te chu an bial chhung \heuh mipuite hri leng laka inven dan tur zirtir turin a hrilh a ni.
