Sorkar laipui sum hmanga hmasawnna hna chi hrang hrang Serchhip District-a nikum April thla atanga kumin January thla thlenga thawh dan vawiin khan Lok Sabha Member, Pu CL Ruala kaihhruai District Development Co-ordination & Monitoring Committee-in DC Conference Hall-ah a thlirlet. Thlirletna inkhawmah hian Pi Vanlalawmpuii Chawngthu Minister, Tuikum bialtu MLA, Pu Lalrinawma, Serchhip Bawrhsap Pi Sangchhin Chinzah, Member Secretary ni bawk leh Centrally Sponsored Scheme sum hmangtu Deptt. hrang hrang hotute an tel a ni. Thusawiin Chairman, Pu CL Ruala chuan CSS sum hmanga hnathawktu Deptt. hrang hrangte chu inpawhtawn tak leh lungrual taka hnathawk ho turin a fuih a ni. He thlirletna inkhawmah hian PMGSY sum hmanga PWD-in Chhingchhip leh Thentlang inkar kawng te, Hmuntha leh Khawbel inkar kawng te, Chhingchhip leh Hualtu, Chhingchhip leh Hmuntha-E. Lungdar-Sailulak inkar kawng siam hna an thawh dan te, Tuichang dawh hna thawh mek dan te, lei hlui Rs.1,60,000/- senga chei that tum a nih thu te tarlan a ni. Hemi bakah hian PHE-in khaw hrang hrang tui in tur a pek dan te, ICDS Project hnuaia tar pension mi 918, hmeithai pension mi 84 leh pianphunga rual ban lote pension mi 24 hnenah pek a nih thu te, National Health Mission hnuaiah nikum April thla atanga kumin January thla thlenga Serchhip District chhunga nau piang mi 882 an awm thu leh an zinga thi 12 an awm thu te tarlan a ni bawk a, he meeting hian tha zawka hnathawh dan tur ruahman a ni bawk a ni.
