Ruang lak chhuah hnuhnung ber chu tukin dar 7 vel khan lak chhuah a ni a, nizan dar 6:10 vela chhiatna thlengah hian mi 3 an thih bakah mi 8 an hliam a ni.
He Complex-a a Lane chung bera Building panga intlar phei chu a chhak lama pialtlep lung tawlhin a deng a, building pathum te hi a hnuailam a sawp chhe vekin a awn nasa hle a, building pahnih te pawh a chhe tel a ni. Chhiatna a thleng tih hriat a nih ve leh mi tlawmngaiten chhanchhuah hna an thawk nghal a, khua a thim zui bakah Power Supply a tawp avangin chak taka hnathawh theih a ni lo a ni. Helai hmunah hi Aizawl DC, DM&R, UD&PA leh a kaihhnawih Department hrang hrang hotute an thleng nghal a, zan dar 7:40 vel a\angin State Disaster Response Force, Aizawl District Disaster Response Force, Mizoram Police Armed Battalion hrang hranga Disaster Response Team leh chhiatna thlen thluha chhanchhuah hnathawh thiam bik, Adventure Club member-ten chhanchhuah hna an thawk \an a. Dar 8 pelh a\angin hliamte chu in chim a\ang lakchhuah \an an ni a, hliam mi 8 lakchhuah an nih hnuah thite lakchhuah an ni a, a hnuhnung ber chu tukin dar 7 vel khan lakchhuah a ni.
State Disaster Response Force chhinchhiah danin he chhiatnaa thite chu Pi Sainghinglovi (52), Pu V. Lalrodawnga nupui, Lalnunfeli (13), Pi Lalngaihliani fanu leh Lalpeksanga (8)
, Pu Lalchuailova fapa an ni a, hliamte chu Pu Lalchuailova (50), Pu Thangliankhupa fapa, Pi Lalthlengdiki (20), Pu Lalremsanga nupui, Lalrohlua (30), Pu V. Lalrodawnga fapa, Pu Lalpiandawla (63), Pu Phirthanga fapa, Pi Lalruatkimi (31), Pu Lal\anpuia nupui, Amos Lalhmangaihzuala (1.7), Pu Lal\anpuia fapa, Pi Lianneihkimi, Lalruatkimi nu leh V. Lalrinkimi (13), Pu V. Lalrodawnga fanu an ni a, hliamte hi Durtlanga Synod Hospital-ah dahluh nghal an ni.
Chhiatna thlenna hmun hi nizan khan Agriculure Minister, Pu C. Lalrinsanga, School Education Minister, Pu Lalchhandama Ralte, I&PR Minister, Pu Lalruatkima, Assembly Dy. Speaker, Pu Lalrinawma, Aizawl North I bialtu MLA, Pu Vanlalhlana, Aizawl South I bialtu MLA, Pu C. Lalsawivunga, Aizawl North III bialtu MLA, Pu C. Lalmuanpuia, Hachhek bialtu MLA, Pu Lalrindika Ralte, Aizawl Dy. Mayor, Pu Lalringliana, AMC Ward No. 1 Councillor, Pi R. Zomuanpuii leh sorkar mipawimawh \hahnem takin an tlawh nghal a, chhanchhuah hna thawktute hmalak dan an enpui a.
Tukin khan Chief Minister, Pu Zoramthanga, DM&R Minister, Pu Lalchamliana, Minister, MLA leh sorkar mipawimawhten chhiat tawhna hmun hi an tlawh a. Chief Minister, Pu Zoramthanga hian mitthi ruang dahna, Leitan YMA Hall a tlawh bakah hliamte chu damdawi inah a kan a, BSUP Complex-a cheng hmun him lama sawnchhuahte pawh tlawhin, a thlamuan a ni. Durtlang Leitana BSUP Complex hi kum 2009 a\ang khan sak \an a ni a, he Complex-ah hian Building 20 sak niin, chhungkaw 320 awm theihna tura ruahman ni mah se, chhungkaw 130 vel an cheng rih a ni.
