(Kum 2020, January ni 16 tlai lama sorkar laipui aiawh, Tripura leh Mizoram sorkar aiawh bakah Bru pawl hrang hrang aiawhten Delhi-a inremna an ziah angin Tripura ram chhung Camp paruk-a awm Bru te hi Tripura-ah an inbengbel hlen dawn a, hei hi Tripura sorkar pawhin a remtih bakah anmahni Bru te pawhin an remti tih inremna thuthlungah hian ziahlan a ni. Bru te hi Tripura sorkarin an inbenbelna tur hmun ruahman sakin an awm mekna camp paruk pawh thla 6 chhunga khar tur a ni dawn a, sorkar laipui chun chhawmdawlna \ha tawk tak a ruahman sak bawk a ni.
Sorkar lehkhapawimawh a\anga a lan danin Bru \awng hmang hi kum 1951 chhiarpuiah chuan Mizoramah mi 51 chauh an awm a, kum 1991 chhiarpuiah chuan sing 2 sang 3 leh 335 an kai chho a, hei hian Tripura a\angin tam tham tak Mizoramah an pemlut tih a lantira ngaih a ni.
Bru te hi politics ah harh tharin kum 1994 khan political party Bru National Union BNU an din a, Autonomous District Council neih tumin hma an la chho a, an thil tum chak zawka nawr tumin hel pawl, Bru National Liberation Front BNLF an din a, BNLF te hian kum 1997 khan Forest Game Watcher Pu Lalzawmliana chu thatin mi pahnih an rubo zui a ni. He thil thleng avang hian Mizote leh Bru te inkarah inepna awm bawk mahse, nunna chan leh hliam tuar sawi tur an awm lo a ni.
BNLF leh Bru Student Union BSU te chuan kum 1998 August thla khan Mizorama Bru awmte chu Mizoram chhuahsan turin an hriattir zui a, he thupek avang hian Bru te hi Tripura ram chhung Camp parukah an cheng zui ta a ni.
Bru Hel pawl, BNLF te hi tharum thawhin an che chho deuh reng a, kum 2010 June ni 30 ah Mizoram police 7 an kah hlum chu an pawikhawih lian ber zinga mi a ni. Remna zawnga \um tam tak inbiak a nih hnuah kum 2005 July 25 ah BNLF mi leh sa 195 te chu Mizoram sorkarah inpein an ralthuamte an tung a, inremnaa lungawi lo Bru Liberation Front of Mizoram BLFM te pawh a hnu 2006 ah Mizoram sorkar kutah an inpe zui ve leh bawk.
Sorkar laka hel-a ralthuam kenga an chetna an bansan hnuah Mizoram sorkar leh Mizoram Bru Displaced Peoples Forum MBDPF te chuan ruahmanna siamin, 2009 November ni 16 a\anga Bru te hruaikir hna thawh tum a ni a, hetihlai hian 2009 November ni 13 ah Bung\huam tlangval Zarzokima chu Bru hel pawl nia hriatten an kahhlum avangin hruaikir hna thawh tumna hi a hlawh chham a, hemi hnu hian Central sorkar hriatpuinain Bru te hruailet hna hi thawh tum ni \hin mahse chhungkaw sawi tham Mizorama let an awm ngai lo a, \um 9 lai a lo hlawh chham tawh a ni.
Sorkar laipui aiawh, Tripura sorkar leh Mizoram sorkar bakah Bru pawl hrang hrang aiawhte tho hian kum 2018 July ni 3 ah pawh khan Bru te Mizorama hruaikir tura inremna hi an lo ziak tawh a, Bru te hian thil phut chi hrang hrang an neih avangin inremna hi a hlawhtling lo a, tuna Tripura-a awm hlen tawh tura inremna ziah leh tak hi a hlawhtling tawh dawn em tih chu hunin a la rawn lantir dawn a ni.)
