Sorkar laipui Council of Ministers Pathianni-ah tidanglam dawn

Sorkar laipui Council of Ministers chu Pathianni chawhma dar 10:00-ah tihdanglam a ni dawn a, Minister thar engemawzat lak luh an ni ang. Tun hi kum 2014 May thlaa Pu Narendra Modi-a kaihhruai sorkar laipui lak luh a nih atanga sorkar tihdanglam a nih vawi thumna tur a ni a, Minister tharte lak luhna atan hian Rashtrapati Bhavan pawh buatsaih tan a ni. Nimin tlai khan Pu Modi-a leh BJP President, Amit Shah-a’n Minister te siksawi dan tur hi an sawi dun a, PM hian NDA-a tel thar, JD (U) leh AIADMK atang pawhin Minister dah a tum nia hriat a ni. Sorkar siksawi a nih dawn avang hian Minister 5-in banna an thehlut tawh a, Minister of state thenkhat chu Cabinet-ah hlan kai an nih rin a ni bawk a, kum 2019 Lok Sabha inthlanpuiah BJP hian MP 350 tal neih a tum avangin, hemi atana an party inbuatsaih nan sorkar hi siksawi tum a ni a, hemi bakah hian Finance minister, Arun Jaitley-a’n Defence ministry a enkawl tel rei tawh avang te, Smriti Irani-i’n Information and Broadcasting ministry a enkawl tel avangte-in siam rem ngai a awm nual a, senior Minister, Pu M. Venkaiah Naidu chu Vice President a nih tak avang pawhin Minister te hna chanpual siam fel ngai a awm nual bawk a ni. Minister bang ta te zinga mi, Pu Rajiv Pratap Rudy-a chuan NDTV hnenah a duh thua bang a nih loh thu leh, party duh dana bang a nih thu a sawi a, Minister of State for Water Resources hlui, Sanjeev Balyan-a pawhin bang tura tih a nih avanga bang nia insawiin, an party rilru hi hre vek lo mah se, thu awi takin a zawm niin a sawi. Banna thehlut zingah hian BJP hruaitu hlun leh Union Water Resources, River Development and Ganga Rejuvenation Minister, Uma Bharti pawh a tel a, Minister thenkhat, hna thawk tha tawk lova ngaihte chu chawlhtir an nih rin a ni a, tun hnaia Madhya Pradesh-a Mandsaur khawpuia buaina chhuaka lo neitu lungawi lo eng emaw zat an thih avanga dem kai tak, Agriculture Minister, Radha Mohan Singh-a chu chawlhtir tur zingah hian a tel ring an tam hle a, rel achetsual fo avangin Railways Ministry pawh tihdanglam a nih rin a ni bawk a, puan tawh angin, Railways Minister, Suresh Prabhu chuan PM hnenah hian ban a dil tawh a, mahse PM hian thutlukna siam rih lo turin a hrilh a ni.