Covid-19 dona tur sum thawh chungchang hi vawiin khan Chief Secretary Pu Lalnunmawia Chuaungo kaihhruaiin Service Association hrang hrang ten an sawiho leh a, ZONET thudawn danin he sawihonaah hian sorkar hnathawkte zinga thusawitu tam ber chua hri leng dolet nan hian an hlawh atanga zaa 5 zel thla thum chhung pek nise tih an rawt a, thutlukna mumal tak nei lovin service association leh sorkar hnathawk mimal tinte kutah dah a ni ta a ni.
Darkar thum chuang sawihona kaihruaitu Chief Secretary Pu Lalnunmawia Chuaungo chuan member kal zawng zawngte zalen taka an ngaihdan tlang taka sawi turin hun a pe a. Association hrang hrang aiawh kalkhawm atang hian mi 43-in thu an sawi a ni.
Chief Secretary chuan Service Association ang a ni emaw, mimal ang pawha COVID-19 dona atana mahni duhthu ngeia sum thawh duhte tan sawrkar a inhawng reng a ni, a ti.
Karkalta Thawhlehni-a CS hova Service Association hruaitute thukhawmin hri leng do let nan Mzoram Sorkar hnuaia thawk Group A, B leh C ten an hlawh basic pay atanga zaa 10 leh group D ten zaa 5 zel, May atanga December thla thleng thawh nise tih rel a ni a, he thuthlukna hian sawi zui a hlawh hle a, sorkar hnathawk zawng zawng intelkhawmna FMGE&W chuan Ningani khan ngaihtuahin, thutlukna lo siam tawh chu ngaihtuah nawn leh turin Chief Secretary hnenah ngena an thlen a. Hemi bawhzui hian vawiin sawihona hi neih leh a ni.
