UN-a lehkha a thehluhah US hian Iran General Qasem Soleimani thah chu sawifiahin, mahni invenna kawnga US chetna a ni a ti a, Iran hian phuba lakletna chikhatah Iraq-a US inkhuarna hmunte missile hmangin a bei a, thi leh hliam an awm lo a, an chet dan hi Iran chuan mahni invenna a ni tih UN ah an hrilh ve tho bawk.
Iran ram hruaitu lu ber, Supreme Leader Ali Khamenei chuan missile hmanga US hi an beih thu nemnghetin US chu Middle East chhuahsan turin a vaukhan a ni. Hetihlai hian US House of Representatives chuan President Donald Trump-a’n Congress pawmpuina lo chuan Iran laka indo a puan theih lohna tur resolution a buatsaih mek bawk.
US president Donald Trump-a chuan Iran in a beilet anih chuan sipai chakna hmanga na zawka beih a nih tur thu lo sawi tawh mahse, Iran-in missile hmanga a beih hnua a thusawiah, sipai chakna hman tumna lam a sawi lang lo a, Iran-in Missile hmanga US sipaite inkhuarna a beihnaah thi leh hliam an awm loh thu sawiin, Iran chu a inhnukhniam nia a lan thu a sawi a, hei hi a kaihhnawih zawng zawngte tana thil \ha ber pawh a ni a ti.
Iran-in Iraq-a US sipaite inkhuarna hmun missile hmanga a beihna hi kum 1979-a Tehran-a US Embassy beih a nih hnua-a Iran-in US laka chet a thawh lehna lian bera ngaih a ni a. Missile 16 hmangin US sipaite inkhuarna hmun pathum a kap a, missile zinga 11 chuan Al Asad \umhmun a fuh a, a dang pakhat chuan Irbil-a US inkhuarna hmun a fuh bawk a ni.
US Joint chief of staff chairman Mark Milley chuan thi leh hliam an awm loh chhan hi inbuatsaih lawkna \ha tak an neih vang a ni tih a sawi.
