Sinlung Hills Council dinna tur Sinlung Hills Council Bill, 2018 Home Minister, Pu R. Lalzirliana putluh chu vawiina Mizoram Assembly Session-ah lungrual taka pass a ni.
Kumin April ni 2-a Mizoram sorkar leh HPC(D) te inremna thuthlung siam tak tih puitlinna tura he Bill pass tak ang hian Sinlung Hills Council-ah hian member 14 awmna, General Council din a ni ang a, member 12 te chu thlan an ni ang a, pahnih dangte chu ruat seat-ah dah an ni ang.
Council-ah hian Chairman leh Deputy Chairman an awm ang a, Executive Council chu Chief Executive Member-in a ho ang a, a hnuaiah a rorelpui tur Executive Member 4 an awm ang. General Council term hi kum 5 zel a ni ang a, Council huam chhungah sorkar sum pek hmangin hmasawnna hna leh inawpna hna te an thawk ang a, kum khatah vawi li aia tlem lo session an nei ang a, an Hqrs. chu Sakawrdai emaw, sorkarin a ruat hmundang emaw a ni ang.
Hqrs. ah hian Sinlung Hills Council Secretariat dinin Secretary in a ho ang a, Secretary hi Joint Secretary rank niin Principal Executive Officer a ni ang a, a term chhung tur chu kum thum a ni ang a, a \ul dan a zirin pawhsei sak theih a ni bawk ang. Sinlung Hills Council hian a budget leh hmasawnna hnathawhna turin ruahmanna a siam thei ang a, chu chu Mizoram sorkarin a pawmpui hnuah Council chuan a hlenchhuah hna a thawk ang a, Council Area chhungah Site Allotment Advisery Board a ni nghal dawn a ni. He Bill sawihonaah hian House Leader Pu Lal Thanhawla tiamin member 15-in thu an sawi a, Opposition Group Leader, Pu Vanlalzawma chuan tun hmalama sorkar leh MNF bakah sorkar leh HPC te inkara inremna thuthlung lo siam tawhah sorkar lamin an tipuitling \ha tawk lo nia a hriat thu te, rorel thei tawk quorum chu Chairman tiam lovin member awm zawng zawng zinga hmun thuma \hena hmun hnih tih chu sang lutuka a hriat thu te, NLUP kalpui danah dan mumal hmang lova kal nia sorkara a hriat thu te a sawi a ni. MNF Opposition member dang, Pu K. Sang\huama chuan Sinlung Hills Council Area chin bithliah thiam harsa tura a rin thu te, Secretary atan dik taka hnathawk thei tur MCS emaw, IAS emaw dah \haa a hriat thu te, an term kum thum tih chu bithliah awm kher lo se \haa a rin thu te, chhiat lak dan tur leh ram pek chungchangah fimkhur a ngaih dawn thu te, inthlanna chuh thei tur kum bithliah, kum 18 tih chu naupang lutuk nia a hriat thu te, Sinlung Hills Council Area pawn lama mite pawhin inthlannaah an chuh theih dan tur siam chu Council Area huam chhung amite tan chauh ni se \haa a rin thu te a sawi a ni. Sawihona tlang kawma member te thusawi \henkhat chhanga sawifiahin Bill puluttu, Home Minister, Pu R. Lalzirliana chuan dan section 35-naa chuh thei chin tur siam chu asawifiah hnuah kum 18 tling chinin inthlanna an chuh thei ang tih chu a \ul huna siam \hat theih niin a sawi a, Secretary hnathawh hun chhung tur kum 3 tih pawh Executive te nena an thawhhona a \hat loh chuan tihdanglam theih tho tur niin a sawi a, section 44-naa sum hman dan chungchang tarlan angin an sum hman chu CAG endik theih tho tur niin a sawi bawk. Inremna thuthlung siam tura inbiaknaah HPC(D) pawl dang, Pu Lalhmingthanga Sanate pawl pawh tel tura sawm a nih thu te, an ni hian Autonomous District Council an phut thu leh inbiaknaah chuan sorkar laipui aiawh pawh tel se an duh thu an sawi avangin an ni chu biak theihah sorkarin a ngai lova, Pu H. Zosangbera pawl nen inbiak zui a ni a, inremna thuthlung siam tak hi Manipur-a Hmar in pui pawhin \ha an ti niin a sawi a, inthlanna nei thuai turin sorkar chuan hma a la ang a, hmasawnna leh boruak ralmuang awm tir chu sorkar ngaihpawimawh ber niin a sawi a ni.
