Mizoram Science, Technology and Innovation Council hnuaia Mizoram State Climate Change Cell leh NABARD Consultancy Services tangkawp buatsaih khawvel boruak, sik leh sa inthlak danglam mek hmachhawn dan tur zirhona vawiina New Secretariat Complex-a Secretariat Conference Hall-a neih chu Chief Secretary, Pu Lalmalsawma’n a hmanpui. Sik leh sa inthlak danglam zelin a nghawng – tuilian, leimin leh ruahtui tlak dan mumal loin mihring khawsaknaa chhiatna leh harsatna tam tak a thlen mek chu Himalaya tlang dunga ram dangte ang bawkin Mizoram pawhin a takin a tuar ve mek tih sawiin, hemi-in chhiatna nasa zawk a thlen theih laka lo inven lawk chu tihmakmawk a nih thu a sawi. He zirhona hi Planning Secretary, Dr. C. Vanlalramsanga’n a kaihruai a, New Delhi-a IHCAP Science Policy Officer, Dr. Divya Mohan, NABCONS Consultant, Suraj Pandey leh Mizoram State Climate Change Cell Project Scientist, Dr. James Lalnunzira Hrahsel thuziak zirho a ni.
