Africa khawmualpuia Sierra Leone-ah chirh tawlh rapthlak takin mi 400 a chhilh hlum a, mi dang 600 an bo bawk. President Ernest Bai Koroma chuan thite hi ni sarih chhung sun an nih tur thu a sawi a, he thil thleng hi kum 20 chhunga Africa rama thil thleng rapthlak ber niin a sawi. President Koroma chuan ram pumah emergency a puang a, ram dangte tanpuina a ngen nghal bawk a, Sierra Leone khawpui, Freetown leh a chhehvelah ruahpui vanawn leh tui lian nasa tak avangin chirh hi a tawlh ta vak mai nia hriat a ni. Thite hi vawiin atanga tun thla ni 22 thleng sun an ni ang a, hemi chhung hian hnam puanzar chu a ngul chanve-ah zar a ni ang. Naktuk chhun dar 12-ah ram pumah heng mite sun nan hian mi tin, an awmna hmun apiangah minit khat an ding dawn niin President Koroma chuan a sawi a, Regent-ah pawh mi engemawzat chu tlang pang tawlhin an chenna in a hnawl avangin, mahni in chhungah an táng bawk niin a sawi. Sierra Leone-a Connaught damdawi in hotute chuan, chirh tawlh leh in chim hnuai atangin ruang 400 chuang lak chhuah tawh niin an sawi a, mitthite hi a ruala phum an nih hmain, an chhungte chu an lainate ruang endik tura ngen an ni. Guinea President, African Union hruaitu ni bawk, Alpha Conde chuan he thil thleng a tuarpuina lantir nan nizan khan Freetown khawpui hi a thleng a, ram dangte zingah Israel chu Sierra Leone tanpui hmasa ber a ni a, mi sing tel ei tur chaw a thawn nghal a ni. Israel ambassador, Paul Hirshson chuan damdawi lamah pawh Israel-in Sierra Leone hi a tanpui tur thu a sawi a, Red Cross chuan Thawhtanni-a he thil thleng sulhnu hi a rapthlak hle tih sawiin, khawpui kawtthlerte chu chirhdum hmunah a chang vek a, engkim a hnawl dul dul mai niin a sawi.
Chirh tawlh hun hi zan, mut reh hlan a nih avangin insaseng hman pawh an awm lova, a then chu mangang takin an tlan chhuak a, an tlan chhuahsan, an chhungte chu chirh tawlh hian a chhilh hlum vek niin an sawi. Sorkar thupuangtu, Cornelius Deveaux chuan, a tirah hmanrua a awm nghal mai loh avangin hnathawh a har hle tih a sawi a, nizan tlai tawh lam thleng khan ruang 297 an chhar tawh tih sawiin, hengte hi mipa 109, hmeichhia 83 leh naupang 105 niin a sawi. He thil thleng tuartu hi an vai chuan 9,000 vel nia hriat an ni a, United Nations pawhin thil pawimawh hmasate a thawn nghal tur thu a sawi a ni.
