Siaha District Hospital, Rs. 9,88,76,937/- senga sak mek chu vawiin khan Siaha bialtu MLA, Dr. K. Beichhu-a’n a tlawh a, a satute chu an hna zawh fel thuai tum turin a chah. He Hospital building hi Aizawl Venghlui mi, Pu F. Sangkunga’n contract-in a sa a, tunah hian hna za zela 95 vel zawh fel tawh a ni. Dr. K Beichhua chuan tuna hnathawh hmabak tlem te la awm chu Revised estimate siam lova zawh fel mai theih tur niin a sawi a, a sak zawh hun atana ruat chu nikum September thla ni tawh mah se, an zawh theih loh avangin kum khat chhung pawhsei a ni a, heti chung hian sum awm loh avangin hnathawh kal lai hi thla hnih chhung a khaihlak leh tawh niin Dr. K Beichhua chuan a sawi a, Siaha District Hospital-in Siaha District mipuite mamawh a phuhruk zawh tawh loh avangin he damdawi in hi sak zawh thuaia, luah thuai a tul thu leh, damdawi in sak chhunga damlo dahna atana Medical Deptt. quarters chhe tawh tak hman chu damlo awmna atan a hman tlak tawh loh niin a sawi bawk. Vawiin vek khan Dr. K. Beichhua hian Siaha-a District Education Office a tlawh a, he office-ah hian kumin June thla atang khan DEO a awm tawh loh avangin Lawngtlai DEO, Pu Lalzuiliana’n a hmui a, hemi avang hian harsatna nasa tak an tawk niin a sawi a, Siaha DEO hnuaiah hian High School 19 leh Middle School 26 a awm tih sawiin, a hmuna thutchilhtu DEO dah thuai turin sorkar a phut a ni.
