State Bank of India Lunglei Lead Bank ruahman angin Siaha District-a Bank hrang hrang ten nikum January thla atanga September thla thleng hna an thawh dan leh an hmachhawp te huam zau takin an thlirlet. He thlirletna inkhawm DRDA Conference Hall-a neih hi Siaha Bawrhsap, Pi Harleen Kaur-in a kaihruai a, hetah hian District Consultative Committee, District Level Review Committee leh District Level Security Committee member te an tel a ni. An thil thlirlet zingah chuan misualten mi account khawih chingpena, an sum dah an laksak lohna tur te, pawisa pek chhuah leh dah luh chungchang te, Bank-in Stand Up India Programme hmanga mipuite hmasawnna atana hna a thawh dan te, PMAY leh Self Help Group hmanga hmasawnna hnathawh dan te, Weaver’s Credit Card, General Credit Card, Swarojgar Credit Card, Kissan Credit Card hmanga hmasawnna hnathawh dan te a tel a ni. He meeting-a Reserved Bank of India aiawhtu Manager, Pu K. Samuel-a chuan Rs.10 thir chhuak thar leh hlui te chu Bank-in a pawm, pawisa dik tak vek a la nih avangin hnawl a thiang lova, pawm vek tur a ni tih a sawi a ni. He meeting-ah hian Bank hrang hrang te Credit-Deposit Ratio tarlan a ni a, State Bank of India CD Ratio chu za zela 96.84 a nih laiin MRB Saiha CD Ratio chu za zela 264.76 a tling a ni.
