Hri kai hmuh chhuah hi thla hlui june ni 1-a Siaha lut, Lorrain school Quarantine Facility Centre chhawng khatna-a inkhung hrang a ni a, an thiante nen vawi 2 test an ni a, an negtive avang leh an inkhung hran chin tur an zawh tawh avangin july ni 1 khan in lama inkhung hrang chhunzawm tura chhuah an ni. Hetihlai hian an inkhung hranna in, chhawng 2-naa awmte zinga mi 6 in coronavirus an kai tih hmuh chhuah a nih leh tak avang leh an intlawhpawh nia hriat avangin an sample lak that leh a ni a, Inrinni-a result chhuakah Siahatla mi kum 20 a upa hian coronavirus a kai tih hriat chhuah leh a ni.
Amah hi hri leng kai te enkawlna hmunah dah luh nghal a ni a, a chenpuite leh an inhnuai luah, mi 9 te chu inkhung hranna hmunah dahluh nghal an ni a, an ina leng lut kai ve mai thei dinhmuna ding chhungkaw 12 te pawh home quarantine nghal an ni bawk.
Siahatla vengah hian mipui pawn chhuah khap nghal a ni a., vawiin a ni khatnaah khan mamawh chakkhai lei ngai an tam avangin tlema thlah zalen deuh a la ni a, naktuk atang chuan pawn chhuah leh veivah khap tlat a ni dawn tih Village Level Task Force te chuan an sawi. Siahatla veng hi Siaha khawpui kawtchhuaha awm a nih avangin veng dang leh khaw dang atanga motor kal tlang phal a ni dawn a, mahse chawlh emaw riah emaw chu phal a ni dawn lo a ni.
