Serkhan-Bhaga NEC kawng laihzauh hnathawh kaihhnawiha kawng siamna atana ram lak dik tak Gauhati High Court Aizawl Bench thupek angin enfiah chhunzawm a ni.
ZONET thudawn danin he kawng km 112-a thui Intermediate Lane Road meter 5 leh a chanvea zauva siamna hna thawhnaah hian mi tam tak ram laksak a ni a, hemi karah hian compensation dilna dik tawk lo nia hriat engemawzat a awm bawk a, compensation pek dan tur ruahmanna siam hmasakah compensation pek ngai zat cheng vbc 21 leh nuai 50 lai a tlin avangin sorkar tan pek ngaihna a awm lova, hemi hnu hian a taka ram neitu intelkhawm chuan Coordination Committee dinin an ram laksak avanga dik taka compensation an hmuh theihna turin Gauhati High Court Aizawl Benchah an zual kova, hei hi High Court-in a ngaihtuah hnuah Court chuan a hmuna thil awmdan dik taka enfiaha, compensation pek ngai chin enfiah nawn turin Kolasib Bawrhsap, District Collector ni bawk a hriattir a, hemi bawhzui hian he kawng laihzauhnaa ram lak compensation pek ngai chin vawiin khan a hmunah enfiah chhunzawm a ni a, vawiin thleng khan Serkhan, Nisapui, Lungmuat, North Chaltlang, Bukpui leh Thingthelhah te endik a ni a, hmabak la awm te chu North Hlimen, Saipum leh Saiphai te a ni. A hmuna thil awmdan endik hna hi Kolasib Bawrhsap Office-a Officer te leh Revenue Deptt.-a Officer te bakah PWD Officer ten an thawk a, khaw hrang hrangah VC te leh ram neituten lo dawngsawngin thil awmdan an hrilhfiah a ni.
