Serchhip District ZPM Steering Committee buatsaih Workers Meet leh Political Training, Serchhip Venglai YMA Hall-a vawiina neihah Serchhip biala a din tur thu hi a puang chiang ta a, Pu Lalduhoma hian Bible chang, “Khandaih te, thal te, fei te kengin i lo thawk a; kei zawng engkim Lalpa, Israel-te Pathian, i cho hmingin ka lo thawk a ni” tih chu a innghahna a nih thu a sawi.

ZPM Chief Minister Candidate Pu Lalduhoma’n Serchhip bialah a ding dawn tih a ti chiang ta a, Chief Minister nilai Pu Lal Thanhawla a khing dawn a ni.

Serchhip district ZPM Workers Meet leh Political Training-ah hian ZPM Chief Minister Candidate Pu Lalduhoma chu a tlin ngei theih nan theihtawp chhuah an tum thu Serchhip Dist ZPM hotute chuan an sawi a, an dil ang ngeia CM candidate ding tura phalsak an ni ZPM hruaitute chungah an lawm hle tih an sawi bawk.

Inkhawm hi Serchhip district ZPM Chairman Pu Rozamliana’n a kaihruai a ni.

Hetianga Pu Lalduhoma’n Serchhip biala a din tur thu a puan chian leh takah hian he bial hi bial ngaihnawm ber tura ngaih a ni ta a, Chief Minister Pu Lal Thanhawla chu bialtu nilai, he biala ding nawn leh tura ngaih a ni a, MNF lamin Senior Advocate Pu C Lalramzauva an din tir leh dawn nia hriat a ni a, PRISM Party President Pu Vanlalruata pawh he bialah hian a ding dawn nia sawi a awm bawk.