Serchhip District Fire Prevention Committee chuan State Level Fire Prevention Committee-in ruahmanna a siam angin ram kang ven hapta tun thla ni 12 atanga ni 17 thlenga Serchhip District-a hman dan tur vawiin khan an rel. He inkhawm DC Conference Hall-a neih hi Bawrhsap, Pi Sangchhin Chinzah, Fire Prevention Committee Chairman ni bawkin a kaihruai a ni. Ram kang ven hapta hawnna inkhawm tun thla ni 12-a DC Conference Hall-a neih rualin khaw hrang hrangah pawh Village Level Fire Prevention Committee bul tumin ram kang ven hapta hawnna neih ve nghal ni se tih a ni a, State Level Fire Prevention Committee ruahman angin March ni 15 aia tlai lova lo leh huan hal vek tur a ni tih hriattirna pawh khaw hrang hrang VC-te hnenah pek tura tih a ni. Hemi rual hian ram a kan loh nan mei lam tha taka sial turin lo leh huan hal tur te chu hriattir an ni anga, ram kang veng tha khua te chu lawmman pek an ni dawn bawk a ni. He inkhawmah hian Member Secretary Thenzawl DFO, Pu Lallianzuala pawhin nikum lama an hmalak dan a tarlang a ni.
