Senate in sum hman tur, Appropriation Bill a pass theih loh avanga US Sorkar buaina chu chinfel theih a la nih loh avangin hnathawktu tam tak an chawl tan.
Harsatna hi chinfel anih hma chuan hnathawktu tam takin hlawh an la thei dawn lo a. Tih dan phung pangngai ang lo taka Pathianni-a Senate thutkhawm neihah pawh Democrat leh Republican te inkarah inremna a la awm thei ta chuang lo a ni. Mihring khawsakna atana mamawh zual tak tak hmun thenkhat chu dan pangngaia hawn nimahse, hmun hmingthang Statue of Liberty ang chi te pawh Federal Shut Down hian a ti buai tan a. Statue of Liberty hi Pathianni khan khar a ni a, New York Governor Andrew Cuomo chuan State sorkar sum hmangin, hnathawktute hlawh tur ngaihtuah a tum thu sawiin he hmun khualzinte tlawh tam ber hi hawn leh thuai a tum thu a sawi thung.
US Sorkar sum hman tur Appropriation Bill hi kum khat chhunga sum hman tur ni lovin, February thla thlenga sum hman tur a ni a. Zirtawpni zan, zanlai thlen hmaa pass hman tur anih laiin, Democrat lam chuan US-a pem lutte chungchanga an thil phut tihhlawhtlin anih hma chuan bill hi an thlawp duh ta lo a ni. Senate inkaihhruaina dan angin member 100 awmah member 60 talin bill hi an pawmpui a tul a. Republican lam hian Senator 51 an nei mek a, bill pass tur hian Democrat lam thlawpna an mamawh a ni. Democrats leh Republican party te inrem theih lohna ber hi ram dang atanga US-a pem lutte chungthu-ah a ni ber a, Democrat lam hian US-a pem lutte chungchanga an thil phutte tihhlawhtlin phawt an phut a ni. Republican lam chuan ramri venhimna tih chak an duh a, chung zingah chuan Mexico nena an ramri hung rawtna pawh a tel a. US-a pemluh dan kalphung siamthat leh sipai enkawlna tura sum tam zawk dah te an duh a ni. Shutdown avang hian US-a hnathawktu mi sing 8 vel zet chu hnathawk thei lovin an chawl a ni. US hian hetiang harsatna, Federal Shutdown tia sawi hi tum engemawzat a lo tawng tawh a, kum 2013 khan ni 16 chhung Shut Down hi neih a ni a, hnathawktu tam tak chu hlawh nei lovin an hna atanga chawlh lak luih tir an ni a, vantlang hmun pawimawh leh park ang chi te pawh khar an ni.
