AAP in seat 63 an lak lai hian BJP chuan seat 7 an la a, Congress chuan hnehna chan phakna bial an nei lo thung. Hnehna chan tuma nasa taka campaign beihpui thlaktu BJP hian inthlan hmasa aiin MLA 4 an neih belh thei chauh a ni.
CM ni lai, Kejriwal hi a bialah hneh taka thlantlin a ni a, deputy CM Manish Sisodia chu a bial Patparganj-ah a khingpui nen a tir lamah an inbei tawk hle a, a tawpah vote 2000 chuang in a chak ta tho a ni.
Delhi Campaign boruak hi a \ang hle a, inhuatna thlen thei zawnga thusawi ngaihmawhawm tak tak pawh a tam hle. BJP chuan seat 55 tal lak inbeiseiin mi langsar tak tak te nen campaign beihpui thlak mahse, an hlawhtling zo lo a. CAA duh lohna Shaheen Bagh-a lantir chu an chet chhiat chhanah BJP hian an puh a, AAP chuan mipui hriselna leh zirna lama an hnathawh leh mipuite hnena power leh tui a thlawna an pekte chu hnehna an chan chhan a ni tih an sawi.
AAP hruaitu Chief Minister Arvind Kejriwal chuan AAP in hnehna a chang chu politics kalphung thar hnehna channa a ni a, rampum tana bung thar kaina a ni a ti.
BJP hruaitu zingah vote sing chuanga hnehna chang ta Atishi chu vote chhiar tirh lamah a hniam chho zar zar a, amah pawhin a zam hman hle tih a sawi a, hnehna a chan takah hian mipuite chuan hmasawnna an duh a ni tih an vote hmangin an lantir a ni a ti.
BJP hian nikum Lok Sabha inthlanah Delhi-a bial 7 an hui vek avangin Assemblh inthlanah hnehna chan an inring hle a, campaign beihpui pawh an thlak nasa a, an MP 270 rual te leh Union Minister 70 rual zetin state BJP hotute an campaign pui a, Home Minister Amit Shah pawh in tina lut lawra campaign beihpui thlak zingah a tel a ni. Citizenship Amendment Act leh National Population Register bakah National Register of Citizen chungchanga inhnialna leh dodalna boruak nasa tak karah Delhi Campaign boruak hi a sang zual a ni.
