SC/ST (Prevention of Atrocities) Act tih dal a ni lo tih SC-in sawi

Scheduled Caste leh Scheduled Tribe mi te laka tharum thawhna thleng thei venna dan dinglai chu engtizawng maha tih dal a ni lo tih Supreme Court in a sawi. Thla hluia Supreme Court thupek siam ennawn tura central sorkarin a ngenna vawiina a chhanna ah Supreme court chuan he thu hi a sawi a, pawi sawi lo ten man an tawh lohna tur ruahmanna erawh siam a ni a ti. March ni 20 khan Supreme Court hian a thutlukna puangin SC/ST (Prevention of Atrocities) Act hnuaiah sorkar hnathawk tumah sorkar phalna la hmasa lo chuan man loh tur a ni tih thupek a siam a, hemi rual sorkar hnathawk kher lo te pawh chhuichian a nih hma chuan he dan hmang hian man loh tur an ni a ti bawk a, hei hian dodalna nasa tak a tawk nghal a, ram chhung hmun hrang hranga tharum thawhna thleng zuiah mi 11 an thih phah a ni. Central sorkar chuan nimin khan he thupek ennawn tura ngenna hi Supreme Court ah a thlen a, Supreme Court hian Scheduled Caste leh Scheduled Tribe mi te laka tharum thawhna thleng thei venna dan dinglai chu engtizawng maha tih dal a ni lo tih sawiin, a dodaltute hian thupek lo tih chhuah tawhte an chhiar chiang lo zawk a ni a ti.