Satwinder-a nupui Seema Rani-in a pasal chanchin ngaihven tura ngenna lehkha a thehluh hnuah Ministry of External Affairs chuan heng mi te chanchin hi a sawi chhuak chauh a ni. MEA chuan kum 2013 a\anga Saudi Arabia-a hnathawk Satwinder leh Harjeet te hi December ni 9, 2015 khan India mi tho Imamuddin-a thih chungchangah tual thah thubuai siamsakin man an nih thu a sawi a, May ni 31, 2017-a an thubuai ngaihtuahnaah embassy aiawh pawh a kal thu leh “hirabha” tia sawi rukruk thubuai awrh belhtir an nih thu a sawi a, Embassy hriattir loin February ni 28 khan tihhlum an nih thu an sawi a ni.
An ruang te laklet tuma Saudi Arabia Ministry of Foreign Affairs an biaknaah Saudi dan hnuaiah thiam loh chantira thi tura chungthu relte ruang hi an ram embassy emaw an chhungte emaw hnenah hlan phal a ni ngai lo tih hriattir an ni tih External Affairs ministry hian an sawi.
Punjab Chief Minister Amarinder Singh chuan he chanchin a hriat hian Saudi Arabia thil tihdan chu a dem hle tih a sawi a, tunlai khawvelah hetiang thil a thleng hi pawi a tih thu a sawi a, MEA chu he thil thleng tur hi an dan theih loh vang leh an puan chhuah mai loh avangin a dem bawk a, External Affairs Minister Sushma Swaraj hnen a\angin hemi chungchang report chiang zawka a dil tur thu a sawi bawk a ni. Amarinder chuan MEA a\angin heng mite laka thubuai siam chungchang leh an chungthu ngaihtuahnaah ukil mumal tak pek an nih leh nih loh a zawh chhuah tur thu a sawi a, India Embassy hrilh hre loa tihhlum an ni ngei a nih chuan mihring dikna leh chanvo bawhchhiatna lian tak a nih tur thu a sawi a, Saudi Arabia thil kalpui dan chu demawm a tih thu sawiin, thlen nawn tawh loh nan UN leh mihring dikna leh chanvo humhimtu pawl te a pun bawk a ni. Mitthi te ruang laklet theih loh chungchangah an chhungte’n mumal takin an thlah liam ve theih nan Saudi Arabia thuneitute dawr turin Sushma Swaraj a phut thu a sawi a, PM Modi leh Saudi Arabia lal fapa te’n inkungkaihna \ha tak an neih avangin MEA tan ruangte laklet hi thil harsa a nih loh tur thu a sawi bawk a, a \ul a nih chuan PM pawh a inrawlh tur a ni a ti. Amarinder hian hetiang thil a thlen tawh loh nan sorkar laipui chu hma la turin a phut bawk a ni.
