Samsung Vice Chairman-in thubuai 5-ah thiam loh chang, kum 5 lungin tang dawn

South Korea-a sumdawng company lian tak, Samsung rochungtu tur, Lee Jae-Yong-a chu vawiin khan a thubuai 5-ah thiam loh chanti vek a ni a, he thubuai hi President hlui, Park Geun-Hye-i ban phah hialna kha a ni a, thubuai siamsaktute chuan Lee-a hi kum 12 tantir an phut na a, kum 5 tang tura tih a ni ta a ni. Samsung company executive dang 4 pawh thiam loh chantir an ni a, an zinga 2 chu kum 4 tang tura tih an ni a, pahnih dan hrem dan tur chu puan loh a la ni. Thubuai siamsaktute sawi dan chuan, Lee-a hian Samsung hotu nihna chu inthlah chhawng zela luah tura tih a nih theih nan won tld. 43 leh vbc. 30, US dollar mtd. 38 chuang pek a tiam a, a pe tawh hial nia hriat a ni nghe nghe a, court chuan President hlui, Park Geun-Hye-i thiannu, Choi Soon-Sil-i fanu pawhin won tld. 7 leh vbc. 30 a chang a, won tld. 1 leh vbc. 60 chu Coi-i laina hnai pakhatin a chang bawk a, hei hi thamna vek a ni. Won tld. 12 leh vbc. 40 erawh chu pek tiam ni mah se, pek hman loh nia hriat a ni.