An mahni lo dawng sawngtu Aizawl District Horticulture Officer, Pu Vanlalnuntluanga Renthlei chuan, Cold Storage hi Horticulture Department-in Dragon Fruit chin lama hma a lak \hat avanga Sorkar laipuiin an dil pawh ni lova a sakna tur an rawn pek a ni tih a sawi a. Hemi atan hian cheng nuai 250 ruahman a ni a, Bangalore-a Rinac India Limited-in an thawk tih a sawi.
A building pumpui hi Square feet 3,950 a zau a ni a, a chhungah hian Dragon Fruit sawngbawlna tur pawh dah a ni a, thlai vawn \hatna hmun, Cold Chamber 4 a awm a, hetah hian thlai Quintal 800 vawn \hat theih tura ruahman a ni. Cold Chamber hrang hrangah hian thlai an dah mil ang zela a vawh zawng siam rem theih a ni a, Dragon Fruit chauh lo thlai chi dang pawh a vawn \hat theih a ni dawn a ni.
Cold Storage Chamber hrang hrangah chhuar siam a nih chuan thlai a len tlem dawn avangin Plastic bawma dah tura ruahman a ni tih Pu Vanlalnuntluanga Renthlei chuan a sawi a. Tun thla ni 4-a enchhin a nih khan Plastic bawm hi a lo la thlen loh avangin hmanhmawh thilah thlaite chu a dahna Bag hmanga dahluh a ni a ti.
Horticulture Department hotute chuan, COVID 19 vanga Mizoram sorkar-in Vegetable Supply Chain a din kaltlanga Aizawla thlai lo thleng khawm chu a tam tham deuh avangin a dah\hatna tur hi hmanhmawh taka ruahman a ni tih an sawi a. Sairanga Cold Storage hi peih a la ni lo chungin thlai dah theih tura siam puitlin a nih avangin a tirah engkim a felfai thei lo a ni, an ti.
Zawhna chhangin Horticulture Department hotute chuan, COVID 19 hri leng vanga harsatna thlen hnuah kum dang zawng aiin thlai chi an pe chhuak tam tih an sawi a. Mipui rilruah intodelh duhna a lian thar nia an hriat thu leh khaw awm danin a zir a nih chuan kumin hian thlai thar a pun ngei an beisei tih an sawi.
