Saipum khuaa tlawmngai pawl hrang hrangin Tuirial Hydro Electric Project siam a nih avanga mipuite tana hamthatna tur chi hrang hrang tihhlawhtlin a nih hma chuan Tuirial Hydro Electric Project chu hawn an phal loh tur thu an sawi a, vawiin khan Saipum Community Hall-ah thu khawmin, kawlphetha Megawatt 60 pe chhuak thei tur, Tuirial Hydro Electric Project hawn theih a lo ni dawn ta chu lawmawm an tih thu an sawi rualin, he Project bul tan a nih dawn khan mipuite hriattir hmasa lovin, hnathawktu, NEEPCO Ltd.-in hna a thawk nia sawiin, bul tan a nih lai khan Saipum khaw mipuite chuan hma lam hun engmah an thlir thiam loh avanga bum nia an inhriat thu leh, tunah hian an mipuiten eizawnna kawng hrang hrangah harsatna an tawk mek niin an sawi a. An khua atanga Kilometre 1 thlang lam zawng chu tuiin a chim vek tawh a, heti chung hian sorkar-in zangnadawmna a pe zo duh lo nia sawiin, Tuirial Hydro Electric Project siam a nih avang hian Saipum khua chu a tuar nasa ber an nih avangin zangnadawmna an dawn tur ang ang pe tur te, a thlawna kawlphetha hmantir tur leh hamthatna dang awm thei ang angte pe turin CM-in a hmunah ngei hawng se an duh thu an sawi a, mipui hamthatna tura an thil phutte tihhlawhtlin a nih hma loh chuan Tuirial Hydro Electric Project chu hawng lo turin Mizoram sorkar an ngen a ni.
Saipum khaw mipuite chuan, Tuirial Hydro Electric Project siamtu NEEPCO Project hotu, Pu S. Chakraborty hnenah an harsatna leh thil phut hrang hrang hi tun thla ni 4 khan an lo thlen tawh nia sawiin, tun thla ni 11-a inbiak leh an intiam chungin inbiak theih a ni ta lo niin an sawi a. An thil phut chungchanga an inbiak hma chuan, vawiin tlai dar 3 atang hian Tuirial Hydel Project kawngpuiah lirthei eng chi mah tlan an remti dawn lo niin an sawi bawk.
