Russia hian Ukraine sipai lawng pathum leh lawng sipai 23 te chu Pathianni khan a man sak a, Ukraine President Petro Poroshenko-a’n Russia ramri hnaih zual hmun \henkhat sipaite thuneihna hnuaiah dah lailawk rih a rawtna chu an ram rorel khawlin a pawmpui a, November ni 28 a\anga \anin ni 30 chhung sipaite hi thuneihna pek an ni ang.
Sipaite thuneihna hnuaiah hian Ukraine sorkar chuan mipuiten lungawi lohna lantira kawngzawh leh thil dang an huaihawt turte a khuahkhirh thei dawn a ni.
Pathianni-a thil thleng hi Crimea tuipui kam hnaihah a ni a, heng lai hmun hi kum 2014 khan Russia chuan a lo awp tawh a, Russia lawng sipaite chuan Ukraine sipai lawngte hi silaia an kah hnuah luh chilhin an man a, Ukraine lawng sipai pathum a\anga paruk vel an hliam a ni.
Ukraine chuan Russia chet dan hi na takin a sawisel a, Russia chuan an ram chin tuipuiah Ukraine lawngte hi an lut lui niin a sawi ve thung. Khawthlan lam ram dangte pawhin Russia chet dan hi an dem thu an sawi nghal a ni.
Hetihlai hian Russia President Vladimir Putin chuan Ukraine in sipai thuneihna Martial Law a puang chu a ngaihmawh thu German Chancellor Angela Merkel nen an inbiakna ah a sawi a, Ukraine in a sipaite ramri hnaiha inring renga awm tura a dah chuan boruak \ha lo zawk a thlen thei dawn tih sawiin, a tul anga inrawlh turin a sawm a ni.
