Russia-a mi 64 thihna kangmei chhuak, fimkhur loh vang Putin-a’n ti

Russia intihhlimna hmun pakhata kangmei chhuak vanga mi 64 zetin nunna an chan chu fimkhur loh vang a ni tih Russia President Vladmir Putin in a sawi a, kangmei chhuaka thi te zinga 41 chu naupang an ni. Pathianni-a kangmei rapthlak tak chhuahna hmun, Siberia-a Kemerovo khua hi President Putin hian a tlawh a, kangmei chhuah dan chhuitute chuan kangmei chhuah thulha ralkher dar ri tur, fire alarm chu off a nih bakah tlan chhuahna tur kawngkharpui te chu a inkalh tih an sawi. Interfax News Agency sawi danin mi 300 rual lungawi lo te chu sorkar office tualah pungkhawmin, a mawhphurtute bantir an phut a ni. Kangmei chhuah chhan hi chiang taka hriat a la ni lo a, Russia Investigative Committee chuan kangmei chhuahna hmun Winter Cherry Mall hian mipui himna tura danin a phutte a bawhchhe nasa hle tih an sawi. President Putin hian mitthi te sunna lantira pangpar \hi a dah pahin mi tam tak thihna thlen chhan chu engdang vang ni lovin fimkhur loh vang liau liau a ni a ti.