He thu hi vawiina Phulpui MNF unit in Sorkar thar leh MLA thar lawmna inkhawm an buatsaihah sawiin Pu Lalruatkima chuan, an sorkar chu midang tih \hat loh emaw tih dik loh emaw sawi sawi hman an nih loh thu a sawi a, Sorkarna an chelh a\angin mipui tan hna an \an nghal mawp mawp zawk niin a sawi a, hetihlai hian Sorkar hmasa thiltih \hatte chu an chhunzawm pahin kalphung thar \ha tak mipui an hmuh tir dawn niin a sawi.
Pu Lalruatkima chuan, sorkar hmasa in zu a zawrh avangin mi tam tak zu bawihah an tang a, mi tam tak an thih phah a, hmeithai leh fahrah tam tak an awm phah niin a sawi a, hemi avang hian Kohhran leh khawtlang an mangang hle a ni a ti. Zu zawrh tih tawp vangin sorkar in sum tam tak hloh dawn mahse mihring nunna a hlu zawk tih chu Chief Minister Pu Zoramthanga ngaihdan a ni a ti a, ram a dam a, mipuite tan a \hat zawk dawn phawt chuan, demna leh sawiselna karah pawh zu zawrh chu an titawp dawn tih a sawi.
Pu Lalruatkima chuan, SEDP hmang a mipuite kawng kawhhmuh leh chhawmdawl chu an tum a nih thu leh thawkrim leh taima, ti tak tak tan dinkhawchhuahna remchang sorkar in zau takin a hawng dawn a ni a ti a, zoram mipui te chu sorkar kal dahnah leh hmalaknaah thurawn pe tur leh \awngtaipui turin a sawm bawk.
Bialtu MLA Prof. F Lalnunmawia pawhin thusawiin, Zoram mipuite sorkar \ha duha an \awngtaina chu Pathianin MNF kaltlangin a hmuh tir mek niin a sawi a, Sorkar tharah mipuiin beiseina sang tak an neih tipuitling turin Chief Minister Pu Zoramthanga hovin chak takin hma an la nghal niin a sawi. Prof. F Lalnunmawia chuan, fur thlen hmain kawng chhe zual siam hna ngawrh taka thawh a ni a, Thisen man lak \hin tihtawp a nih bakah sorkar hmasain ration chini hun rei tak a tihtawp tawh pawh sem leh thuai tura hmalak a ni a ti.
Inkhawm hi Phulpui MNF Unit President Pu Lalbiakngenga’n a kaihruai a, tlai lamah sorkar thar lawmna ruai an \heh a ni.
