Tukina ruahsur khan Sesawng leh Khawruhlian inkara Tuirini lui kanna lei dawh lailawk panna kawng a tihnal avangin helai tlangdunga khualzin phur lirtheiten harsatna an tawk. Zonet thudawn danin, tukin ruahsur khan lei dawh lailawk panna kawng atana PWD-in kawng a siam chawp chu a tihnal avangin lirthei a tlan tlang thei lova, chawhma dar 11 vel khan PWD-in JCB hmangin kawng hi a lai thaa, hemi hnu hian harsatna dang awm lovin lirtheite chu an tlang chhunzawm leh nghal a ni. Helai kawnga tlan thin Maxi Cab Driver pakhat chuan, kawng nal vang hian darkar 4 vel zet kawng lakah an tangkhang tih Zonet a hrilh a. Lei helna atana PWD-in kawng a siam chu a chho ulh deuh a, ruahsurin kawngpui a tihnal bawk si avangin lirthei tan zawh ngaihna a awm lo nia sawiin, an tlangdung mipuiin harsatna an tawh loh nan Tuirini lei chu furpui thlen hmaa siam that hman ni se an duh hle tih a sawi.
