Nimin atanga vawiin thlenga Zoram hmun hrang hrang tuama nasa taka ruah sur avangin hmun tam takah kawng pawimawh a ping. Aizawl-Champhai kawngpui, National Highway 6 chu hmun engemaw zatah lei minin a hnawh ping a, heng zingah hian Keifang khaw chhung, Aizawl lama lei min nasa tak, kawng chung metre 70 vela sang atanga lo tla, metre 50 vela zau awh pawh a tel a, Keifang Quarry bulah pawh lei min lian takin kawng a hnawh ping a, hengte hi a bul hnaia PWD miten khawl hmangin an thian a ni. Kawlkulh leh Dulte bul velah pawh lei minin hmun 20 velah kawng a hnawh ping a, hengte hi a theih dan ang anga then fai mek a ni a, vawiin tlai khan motor te chi chu a kal theih tawh nia thu dawn a ni. Ruah hi a sur zui zel avangin lei min thar a awm reng a, Aizawl -Sairang- Lengpui kawng, National Highway 44-A pawh hmun 23-ah lei minin a hnawh ping a, PWD hotute sawi danin, vawiin chawhnu khan kawng pinna laite hi a inchhawka kal theiha siam tlang a ni. Aizawl leh Sairang inkar, National Highway 54-ah pawh hmun tam takah lei minin kawng a hnawh ping a, hengte hi lirthei kal theiha siam tlang leh vek tawh a ni.
Aizawl-Sateek- Darlung kawng pawh vawiin khan Sateek atanga km 1 leh a chanve vela hlaah leiminin a hnawh ping a, hei pawh hi lirthei kal theiha siam tlang tawh nia thu dawn a ni.
Ramhlun Sports Complex kawng pawh lei minin a hnawh ping a, hei hi lirthei kal theih turin vawiin khan thenfai a ni. Aizawl khawpui chhung hmun engemawzatah pawh lei minin kawng a hnawh ping nual a, Maubawka PHE office bula lei min, kawng hnawh pingtu chu vawiin khan khawtlangin hnatlangin an thian fai a ni.
