RSS hotupa, Mohan Bhagwat chuan Rohingya Muslim-te, ram chhunga awmtir a rem loh chhan chu tharum thawh ching leh mi firfiak pawlte nena inkungkaihna thuk tak nei an nih vang niin a sawi a, Bangladesh a\anga dan lo-a lo lutte avanga harsatna tam tak, ramin a tawh mek laia Rohingya mite avanga harsatna a thlen belh chu thil \ha lo tak niin a sawi. He thu hi Nagpur-a Dussehra puala inkhawma a sawi a ni a, he inkhawmah hian BJP hruaitu hlun, LK Advani leh Union Minister, Nitin Gadkari pawh an tel a ni. Bhagwat chuan West Bengal leh Kerala sorkarin raltlante pui anga an insawi pawh politics-a ham\hatna um vang niin a sawi bawk.
External Affairs Ministry thupuangtu, Raveesh Kumar pawhin Rohingya mite chungchang hi Bangladesh sorkar nen sawi dun reng a nih thu leh, a hma thei ang bera thil tihfel theih beisei a nih thu a sawi a, Myanmar rama Rakhine-a Hindu eng emaw zat ruang chhar a nih chungchangah Myanmar sorkar chu thil awm dan chhui chiang tura ngen a nih tawh thu a sawi bawk. Raveesh Kumar chuan a firfiaka chetna eng chi mah, India ramin a palzam ngai lo tih sawiin, he thil thlenga mawhphurtute pawh hi man chhuah leh hrem an nih beisei a nih thu leh, thi te chhungte la dam pawh Myanmar sorkar hian chhawmdawlna leh venhimna \ha a pek ngei beisei a nih thu pawh a sawi a ni.
