Rohingya ral tlan pahnihin Myanmar-a thawn let rih lo tura Supreme Court an ngenna chu thil hmanhmawhthlak nia roreltute’n an ngaih avangin naktip, Thawhtanni khian ngaihtuah a ni dawn. Puan tawh angin, Myanmar rama Rakhine atanga Rohingya muslim raltlante thawn let dan tur ruahman chu National Human Rights Commission chuan August ni 18 khan sorkar laipui a lo hriattir tawh a, Rohingya mite chuan an ramah tihduhdahna leh tharum thawhna an tawh mek avangin, NHRC thutlukna hi khawvel ram hrang hrangten mihring dikna leh chanvo humhalh chungchanga inremna nen a inkalh niin an sawi a ni. Puan tawh angin ramchhung hmun hrang hrangah Rohingya muslim raltlan, 14,000 vel, UN hnuaia raltlan anga inziak lut an awm thu leh, midang 40,000 vel, dan lo-a ram chhunga awm an awm tih Minister of State for Home, Kiren Rijiju chuan Parliament a lo hrilh tawh a ni.
Chanchin Thar Rohingya raltlante thawn let chungchang Supreme Court-in ngaihtuah dawn
