Bangladesh sorkarin Myanmar rama Rohingya Muslim-te chenna in 2,600 chuang hal niin a sawi. Myanmar sorkar hotute chuan he thil thlengah hian a mawhphurtu ber chu Arakan Rohingya Salvation Army niin an sawi a, he pawl hian kar kal ta khan sipai hmun thenkhat an bei niin an sawi bawk. Bangladesh-a ral tlan, Rohingya te chuan chenna in hal leh inthahna te hi Myanmar sipaiten um chhuah an tum vanga thleng niin an sawi thung a, mihring dikna leh chanvo humhalhtu pawl, Human Rights Watch chuan vansang atanga thlalak hrang hrang an enfiahna atangin, heng chenna inte hi Myanmar sipaite hal ni ngeiin an sawi bawk a ni. UN hnuaia raltlante buaipuitu pawl, UNHCR chuan Bangladesh-a raltlante hi mi 58,600 an tling tawh tih an sawi a, raltlante lo dawngsawngtu pawl hrang hrangte tan pawh a hautak sawt hle tih an sawi.
Turkey Foregin Minister, Mevlut Cavusoglu chuan Bangladesh thuneitute biain, Rohingya Muslim raltlante hi hnar lo turin a ti a, raltlante enkawlna senso zawng zawng pawh an tum vek tur thu a hrilh bawk a ni. Cavusoglu chuan Myanmar Rakhine-a thil thlengte sawi ho tur hian inkhawmpui koh an tum thu leh, Organization of Islamic Cooperation an din tawh thu te, Rohingya Muslimte harsatna tawh thin tihtawp dan tur an ngaihtuah dawn tih a sawi bawk. Turkey hi ram danga harsatna tawkte tanpuina sum thawh hlawk ber pahnihna a ni a, kum tin US Dollar tld. 3 leh vbc. 60 an thawh thin nia chhut a ni. Turkey President, Recep Tayyip Erdogan pawhin Rohingya Muslim te chungchangah hian Muslim ram dang hruaitu 13 a lo be tawh bawk a ni.
