UNICEF Deputy Executive Director, Justin Forsyth chuan Bangladesh-a Rohingya Muslim raltlante tan tun dinhmunah kir leh a la him lo niin a sawi. Forsyth chuan raltlante hi an kir leh hma-in, Myanmar-a an himna chungchang ngaihtuah tur tam tak a la awm tih a sawi bawk a, Bangladesh-a raltlante a kawmte pawhin tun dinhmunah chuan Myanmar-a kir leh an la duh lo vek niin a sawi bawk a ni. Puan tawh angin Rakhine biala muslim hel pawl, Arakan Salvation Army-te chuan sipai hmun an beih avangin, Myanmar sipaiten beihpui an thlak ve nghal a, 2017 August thla atang khan, mi 680,000 vel Bangladesh-ah an raltlan a ni. Rakhine-a buaina chungchanga Myanmar sorkar thurawn petu Advisory Board member, Bill Richardson ban tûkah khan Forsyth hian Aung San Suu Kyi a be nghal a, Rakhine-a ram dang tlawmngai pawlte an luh phalsak tur leh, Rohingya Muslim te an chhawmdawl phalsak turin a ngen leh a ni.
Ram Pawn Rohingya Muslim raltlante tan Myanmar-a kir la him lo niin UNICEF-in sawi
