Fair Price Shop Automation khawl hi Food Security 2013 in a kentel a ni a, he khawl hian bukna a keng tel a, retailer ten buhfai leh thildang an hralh te chu he bukna hmang hian an buk dawn a ni. He khawl thar hmanga ration la tur te chuan an ration card number emaw, aadhaar number emaw POS machine ah chhulutin finger print scanner ah a kut zungtang a nem ang a. A aadhaar number leh a finger print a inmil chuan an chhungkaw ration lak theih zat quota a lo lang ang a. POS khawl nena inzawm a bukna khawl, electronic weighing device ah a ration lak zat tur buk a ni dawn chauh a ni. Engemaw avanga fingerprint authentication hi a dik theih loh chuan sms hmangin one time password a lo thleng anga, chumi hmang chuan ration a lak theih tho dawn a ni. He khawl hmang hian buhfai leh thildang, a dawng tur dik tak ten duk dik takin an dawng thei dawn a, Retailer te hralh bang a hriat theih vek tawh dawn avangin hralh ruk emaw tihcingpeng emaw a theih tawh dawn loh niin sorkar thuchhuah chuan a sawi.
Dy. CM Pu Tawnluia chuan, Fair Price Shop Automation khawl thar, Mizoramin a hmang \an thei tur chu hmasawnna ropui tak a ni a ti a, sorkarin buhfai a lak khawm semchhuaktu retailer te chu dawrkai dang nen an in ang lo tih an inhriat a ngai tih sawiin an mahni hlawkna leh hamthatna tur atan chauh thawk an ni lo tih an inhriat a \ul a ni a ti a, mipui rawngbawlna a ni tih an thinlunga vawng chung a an hna thawk turin retailer te a chah a ni.
Khawl hman dan hi mithiamten retailer te an zirtir nghal a ni.
