A hmanna inkhawm lian ber Aizawl Sipai Lammuala tukin dar 8-a neihah Mizoram Larsap Pu Kummanam Rajashekharan chuan hnam puanzar pawtpharhin parade contingent 9-te lam a endik a, hnam puanzar chibai an buk a chhanglet bawk. Thuchah sawiin Larsap chuan kum 70 kalta vawiin angah khan India chu mipuite ro inrelna ram Democratic Republic-ah siam a ni a, ram danpui \ha tak hnuaiah mitin intluk tlanna, zalenna leh inpumkhatna neih theih nan ram hruaitu hmasa te khan ram danpui \ha tak an duan avangin zahna chibai buk a \ul tih a sawi a, tunhnaiah Mizoram Assembly inthlanna dik, felfai leh ralmuang tak neih a ni chu lawmawm a tih thu sawiin, inthlanna buatsaihtute leh a tihlawhtlingtu tlawmngai pawl hrang hrangte hnenah lawmthu a sawi a ni. Pu Kummanam Rajasekharan chuan a kaihhruai Mizoram sorkar chuan ei leh bar tur lama intodelhna a ngaihpawimawh dawn thu te, hemi kawngah hian lei tih \hatna hlo damdawi tel lo, organic farming lam uar a nih dawn thu te, kawlphethaa intodelhna a ngaihpawimawh dawn thu te, mipuite ham\hatna leh martar chhungte ngaihpawimawh an nih dawn thu te, mi retheite dawmkanga, rual taka hmasawnna thlen tir tum a nih thu te a sawi a ni. Larsap chuan dan leh thupek kengkawh \haa Mizoram ralmuang taka siam zel te, ramri \ha taka venhimte leh thingtlang khaw tihhmasawnna lam ngaihpawimawh a nih dawn thu te a sawi a ni. Pu Kummanam Rajasekharan chuan chak zawka Mizoramin hma a sawn theih nan hmasawnna ruhrel siam\hat tum a nih thu te, Mizoram dung leh vangah kawng \ha a awm theih nan nasa taka a thara \an lak tum a nih thu te, zirna lamah pawh nasa taka hmasawn theih nan zirna siam\hat tum a nih thu te a sawi a, zirlaiten an zirna hmang \angkaia an thiamna eizawn nan an hman theih nan vocational training lam ngaihpawimawh a nih dawn thu te, Rural Development Deptt hmang \angkaia retheihna umbo tura hmalak tum niin a sawi bawk. Larsap chuan Mizoram chu State fai ber a nih theihna turin \an lak tum a ni tih a tarlang a, Mizote ngaihhlut leh duhdan chawisangin inkaihhruai a ni ang a, sports lamah nasa taka hmasawn turin \an lak a ni dawn niin a sawi a ni. Larsap chuan Mizoram \halaite ruihhlo leh a kaihhnawih thil \ha lo dangten nasa taka a eichhiat avangin ruihhlo leh ruihtheihthil dang do tura hmalak a ni dawn niin a sawi a, hemi kawnga sorkar hmalakna hi thlawp turin mipuite a ngen a ni. Republic Day lawmna parade-ah hian Contingent 9 te lam chu DSP Pu C. Lalsawta’n a kaihruai a, lam te hi Armed Contingent 6 leh Band party 3 an ni. Republic Day lawmna inkhawmah hian Larsap chuan Governor’s Gold Medal 1st BN MAP Inspector, Pu F. Lalhmingliana leh 1st BN MAP Havilder Pu K. Lalrohlua te hnenah a hlan a, Governor’s Silver Medal chu 5th IR BN Inspector, Pu KT Beikhai, 2 BN MAP Inspector, Pu R. Lalrumliana leh Sub- SI(UB), CID Crime Inspector, Pu Zoramsanga Sailo te hnenah a hlan bawk. He inkhawmah hian President hnen a\angin Fireman PC Remruatdika’n hnathawh \hat lawmman a dawng dawn tih puan a ni. Vawiina Aizawla Republic Day lawmnaah hian NGO Coordination Committee ngenna ngaipawimawhin a lawmna inkhawm hmanpuitu sorkar hruaitute leh officer lian te bak an awm lova, a hmuna kal Zonet reporter sawi danin a lawmna inkhawmah hian oppisition MLA te hmel hmuh tur a awm lova, Lammual sira mipui \hutna zawng zawng a ruak vek bawk a ni.
Lammuala lawmna inkhawm neih zawh hian Larsap chuan mi pawimawh sawm bikte Raj Bhavan-ah thingpui a in pui a ni.
