Reiek Sub Headquarters Mizo Zirlai Pawl-in vawiina Reiek Community Hall-a Zirtirtute Ni an hmanna chu School Education Minister, Pu H. Rohluna’n a hmanpui a, ram leh hnam siam thatna atana hmahruaitu zirtirtute chu duhsakna a hlan. Pu H Rohluna chuan, zirtirtute chu zahawmna leh thiamna petu an nih avangin zah an phu hle tih a sawi a, ram leh hnam siam that nan inpekna thar nen an hna thawk zel turin a chah bawk. Minister chuan, sorkar laipui thuchhuak ang leh Right To Education Act-in a phut angin sorkar leh mimal zirna in hrang hranga zirtirtute chuan training an neih vek a ngai tawh dawn tih a sawi a, hemi atan hian sorkar laipui chuan, National Institute of Open Schooling (NIOS)-ah zirtirtute tan training Course a hawn belh tih sawiin, tun thla ni 15 thleng inziah luh theih a nih thu a sawi. Pu H Rohluna chuan, zirna in hrang hrang thuam that tum a nih thu a sawi a, hemi atan hian NABARD leh NEDP atangin sum hmuh a ni a, Primary leh Middle School-a zirtirtu indaih lohna phuhruk nan Primary School zirtirtu 100 leh Middle School zirtirtu 60 lak nan thil pawimawh tihfel mek niin a sawi bawk. He inkhawmah hian Reiek BDO, Pi S.T. Lalvensangi, Education Department hotute, Reiek-a zirna in hrang hrang zirtirtu leh zirlai te bakah khawtlang hruaitute an tel a ni
