Rawlthar rual football team pakhata mi leh an coach, Thailand ram puk pakhata tang mek te chu nung dama chhanchhuah theih an la awm beisei a ni tih Thailand Deputy PM in a sawi a, heng rawlthar rualte chhanchhuah tum hian chhanchhuaktu pawl chuan ni 3 zet an bei tawh a ni.
Heng rawlthar rualte hi kum 11 leh 16 inkar mi vek an ni a, an coach hovin Chiang Rai biala awm puk pakhat chu Inrinni khan an lut a, ruahsur vanga tui lianin puk luhna chim tak avangin an tang ta a ni. tui chim chin a san zel vanga chhanchhuaktu pawl ten hna an thawh hleih theih loh hnuah Navy lama tui chhung lut thiamten tunah hian puk chhung hi an luh chilh leh mek a, puk chhungah ke hniak an hmuh avangin an la dam beisei a ni. Deputy Prime Minister Prawit Wongsuwon chuan rawlthar rualte hi nung dama chhanchhuah an nih ngei a beisei thu a sawi a, ei tur nei lo mahse, tui in tur tal an neih chuan an dam khaw chhuah theih a beiseiawm a ni a ti. An luhna puk, Luang Nang Non hi khualzinte tlawh zin tak a ni a, lei hnuai lamah kilometre engemawzat-a thui a ni.
