Ramrikawna FCI Kudam chu Sairanga Supply Department ram pekah sawn a ni dawn tih Rajya Sabha member, Pu Ronald Sapa Tlau-in a puang a. Hemi atana thil tihfel ngai awmte tihfel thawkhat tawh niin, kum 99 atan Land Lease an pe dawn tih a sawi. State Level Consultative Committee on Food Corporation of India Chairperson nibawk Pu Ronald Sapa Tlau hian vawiin khan Aizawl Zarkawt venga Hotel Regency Conference Hall-ah thuthar lakhawmtute kawmin, hemi chungchang hi a hrilhfiah a, duhthusamah chuan FCI Kudam hi Rel luh theihna hmuna dah tura tih ni mah se, Mizoram chu tlang ram a nih avangin State dang nena inang diak diaka thil tih theih a nih loh avangin, Sairanga Supply Department ram chu pawm a ni ta tih a sawi a. Karleh lamah ram inhlanna lehkha tihfel hman beisei a nih thu leh rei lote hnuah hna pawh \an theih beisei a nih thu a sawi. Pu Ronald Sapa Tlau chuan, tun dinhmuna Mizorama buhfai chhekkhawl sa chu a tam thawkhat nia sawiin, tunah hian Aizawlah buhfai Matric Tonne 3,512, Lungleiah Matric Tonne 1,384, Lawngtlaiah Matric Tonne 1,052, Bairabi-ah Matric Tonne 4,189, Kolasib-ah Matric Tonne 907 leh Bualpuiah buhfai Matric Tonne 1,001 avaiin Matric Tonne 12,045 chhekkhawl a nih thu leh tunah hian kawng lakah Rel 3 hmangin Matric Tonne 8,000 lo phurh luh mek a ni, a ti. FCI buhfai chu mihring ei atana duhthusama \ha a nih tih sawiin, Pu Ronald Sapa Tlau chuan, bufai \hat leh \hat loh endikna pawh uluk taka neih \hin a nih thu a sawi a. State Sorkar-in hmun dang a\anga buhfai a lei \hinah FCI aia \ha leh tlawma leina tur an hria a nih chuan dodal lova lei tir an ni \hin a, hun engemaw chen Mizoram Sorkar pawhin FCI buhfai lei lova hmun dang a\anga a lak hnuah FCI buhfai chu a tlawm bakah a \ha tih an hriat avangin a lei leh a, rei lote chhungin Sorkar chuan cheng vbch 10 vel a hlep thei niin Pu Ronald Sapa Tlau chuan a sawi.
Zawhna chhangin, amah \awiawmtu Food Civil Supplies and Consumer Affairs Deirector, Pu Abhijit Singh chuan fur lo thleng tur atana inbuatsaihna chu ngawrh taka kalpui a nih thu leh Mizoram hmun hrang hranga Supply Department Kudam-te chu dah khah deuh vek a nih tawh thu a sawi a. Tunah hian Lawngtlai District-a Kudam pakhat leh Lunglei-a Kudam pahnih tih loh a dang zawngah chuan buhfai hi chhek khawl ngah vek a nih tawh niin a sawi.
Hemi hma hian State Level Consultative Committee on Food Corporation of India, Mizoram chu an Chairman, Rajya Sabha Member, Pu Ronald Sapa Tlau hovin an \hukhawm a. FCI-in Mizorama buhfai a lakluh kawnga hmasawn dan tur te, buhfai chhek khawl reng reng fimkhur loh vang emaw a awm rei vang emawa chhe thei a nih avangin a enkawl kawngah fimkhur a ngaih thute an sawi hova. Hun engemaw chen an lo buaipui tawh Ramrikawna FCI Kudam chu a sawnna tur Supply Department-in ram a pekah sak a nih dan tur leh hemi atana hmachhawp hrang hrangte an sawi ho a ni. Vawiina State Level Consultative Committee on Food Corporation of India, Mizoram \hutkhawmnaah hian Supply Director, Pu Abhijit Singh, Joint Secretary, Pu R. Lalchhanhima bakah FCI hotute an tel a ni. ——–
Aizawl Customs Division Anti Smuggling Unit in an thudawn bawhzuiin Muallungthu daiah lirthei pakhat-a phurh rangkachak kg 29, cheng vbc 9 nuai 16 sing 7 sang 8500 hu an man.
Rangkachak phurhna hi bolero car a ni a, Serchhip a\anga Aizawl lam pana tlan a ni. Rangkachak man te hi tlang 29 a ni a, tlang khat hi kg 1 zela rit ni a, vaiin kg 29-a rit a ni. Inrinni tlai dar 3:30 vel khan Anti Smuggling Unit hian a phurtu motor nen hian lo manin, a neitua puh kum 55 mi Hualzidinga Champhai Venglai nia in chhal pawh an man nghal a, thubuai an siamsak a, Rangkachak tawlhruk dan kimchang hi chhui zui mek a ni. Hemi hmalam, kum kalta chhung khan Aizawl Customs Division hian Rangkachak tawlh ruk hi \um 4 an lo man tawh a, heng te hi a vaiin kg 8.3, cheng vbc 2 leh nuai 50 hu a ni.
