Nimina Sub-Division Level Task Force on Mitigation of Corona Virus chairman Pu Lalsanglura, Tlabung SDO (C) hoa thukhawmten, chaw atana rinpui ber buhfai tiamin, ei tur lam chi reng reng ram pawn atanga lakluh an lo khap tawh a, nimahsela vawiin lam thlengin hemi avanga mipui chiai thawm hriat tur a awm loh bakah, ei tur chheksa lei tuma inchuh hmel hmuh tur an awm lo tih Tlabunga Zonet reporter chuan a sawi.
Hetih lai hian, Kawrpuichhuaha inkhuar 2nd Bn MAP-te chuan, vawiin thleng khan meilawng hmanga Kawrpuichhuah paltlang tur mi 454-te chu lo endik tawhin, India khua leh tui an nihna nemnghet thei tur lehkha pawimawh an neih leh neih loh an lo enfiah tawh a, vawiin thleng khan ramdangmi nia rinhlelhawm deuh man tur an la tawng lo tih an sawi.
Covid-19 hrileng laka inven tuma beihpui thlaka hma lak tan a nih hnu-ah, Tlabung khaw chhung leh pawna screening point siama endik zat chu mi 1650 vel an tling tawh a, an zinga a tam ber chu hnam dang, Kawrpuichhuah kaltlanga Tlabung pan an ni deuh ber a ni.
