Ministry of home affairs in vawiina thupek a tih chhuah zulzuiin, Mizoram sorkar chuan mipui kharkhipna thupek kenkawh chhunzawm chhunga dawr in hawng thei te a tih chhuah belh a, kawngpui dunga bungraw phur lirthei lian siamna workshop leh petrol/diesel pump te hawn tur a ni a. Thingpuife siamna hmunah te hnathawh chunzawm a ni ang a, hnathawktu an rawih \hin zatve an chhawr phal a ni ang. Sangha dil enkawl, zawrh leh a chi semchhuahna kawnga hmalakna te pawh a pangngaia kalpui tur a ni.
Rampum huapa mipui kharkhipna thupek, May ni thum thlenga kenkawh leh turah tun thla ni 20 a\ang khian ram sum leh pai dinhmunin a tawrh lutuk lohna turin engemawchen thlahdul a ni dawn a. Ministry of home Affairs thupek thar tih chhuahah loneih leh a kaihhnawiha thawktu zawng zawngin an hna pangngai an thawh phal a ni ang a, thlai thar hralhna lam buaipuitute pawhin dan pangngaiin an hna an thawk thei dawn a ni.
Mizoram sorkar chuan mipui kharkhipna thupek pawhsei chhung hian tlema inthlahdul deuh-a mipui nawlpui tana harsatna thlen lutuk lo zawnga kalpui tumin ruahmanna a lo nei lawk tawh a, Chief Minister Pu Zoramthanga pawhin mipui harsatna thlen lutuk lo zawnga kal anih tur thu hi a lo puang tawh a, hetihlai hian vawiina Ministry of Home Affairs thupek tih chhuahah, tun thla ni 20 thlen hma chuan rampum huapin ruahmanna inang tlang khauh taka kenkawh tur a ni tih tarlan a nih avangin Mizoramah pawh kalphung tur duan lai lawk tawh chu her rem leh a ni.
