Sorkar laipui chuan inkaihhruaina a siam hi rampuma hman tur a nih thu leh State malin an duh anga an tih danglam theih a nih loh thu a sawi a, hetihrual hian a aia khauh zawka kalpui \ula an hriat chuan state sorkarte thuneihna-ah a dah thung
May ni 3 thlengin thlawhna service leh rel service te bakah passenger phur lirthei ang chi te a la ding chhunzawm zel dawn a, phalna pek tih loh thil siamna hmunte pawh khar vek a la ni ang a, zirna in leh a kaihhnawihte pawh khar chhunzawm zel tur a ni. Mipui punkhawmna ang chi reng reng buatsaih phal a la ni dawn lo a, mitthi vuinaah pawh mi 20 aia tam punkhawm phal loh a la ni chhunzawm zel ang.
Coronavirus darh \anna bupui chhin chhiah bik te leh a kai tam zualna hmunte tih loh hmun dangah chuan April ni 20 a\angin mipui kharkhipna thupek hi thlahdul hret a ni dawn a. Damdawiin leh nursing home ang chi te, damdawi zawrhna leh ran damdawiin te, damdawi siamna hmun te leh damdawi lam kaihhnawih hmanraw siamna hmun te chu a pangngaia hna an thawh phalsak a ni ang a.
Loneih leh a kaihhnawiha thawktu zawng zawngin an hna pangngai an thawh phal a ni ang a, thlai thar hralhna lam buaipuitute pawhin dan pangngaiin an hna an thawk ang a, loneih leh a kaihhnawih hmanraw zawrhna dawr te pawh hawn a ni ang.
MNREGA hnuaiah pawh hnathawh phal a ni ang a, hnathawktute chu inhnaih taka an awm lohna tura ruahmanna siam tur a ni thung a, bungrua eng chi pawh phurh kual phal a ni ang a, bungraw phur rel pawh a tlan ang a, nitin mamawh zawrhna dawrte pawh hawn a ni ang.
Print leh electronic media lam te, DTH leh cable service te chu an hna a pangngaia an thawh phal a ni a. April ni 20 hnuah chuan thingtlang lama awm, thil siamna hmun te pawh hawn a ni ang a, kawngpui siam hna te, thingtlang lama building sak laklawh lai chhunzawm te pawh phal a ni ang.
Reserve Bank of India, Bank, ATM leh insurance company te pawh dan pangngaiin hna an thawk anga, central lama pisa pawimawh chin leh state sorkar-a pisa pawimawh chinte chu hawn a ni bawk ang.
