YMA, Tlabung branch-te hian thutkhawm hmanhmawh kohin, foreigner ni ngeia rinhlelhte chungchang hi an ngaihtuah a, chumi hnu-ah an awmna Serhuanah kalin thil awmdan an zawhfiah hnu-ah, ramdangmi ni ngeia an hriat avangin Tlabung police kutah an hlan a ni.
Tlabung branch YMA secretary Pu B Lalhuthanga chuan, an rinhlelh mi pathum zinga pakhat chu a nupui pa hmingin electoral roll-ah a inziak lut tih an hriatchhuah thu a sawi a, mi dang pahnihte chuan eng lehkha pawimawh mah an nei lo hrim hrim tih a sawi a, an chungah dan anga hma lak a nih theih nan, police kutah an hlan tih a sawi.
Hetih lai hian, nikum January 23 khan Tlabung sub-division huamchhunga Khojoysuri khuaa cheng Lokhi Ranjan tia hming lem invuah, a hming tak Suro Kanti chu Bangladesh mi a ni tih finfiah a nih hnu-ah, Foreigners Act 1946 section 14 hnuaiah thubuai siamsak a lo ni tawh a, hriat theih chinah Tlabung police station-a foreigner thubuai awrh hmasa ber a ni.
